Birat Post बिहिबार, पुष ०९, २०७७ मा प्रकाशित
विराटनगर ९ पुष ।
कोशी बहिरा संघले श्रवण दृष्टिविहीनता सम्बन्धि अन्तरक्रिया कार्यक्रम सम्पन्न गरेको छ ।
संघले बहिरा तथा अपाङ्गताका क्षेत्रमा काम गरिहेकोमा आफ्नो सेवालाई थप परिमार्जित गरेर श्रवणदृष्टिविहीनताको क्षेत्रमा समेत काम गर्दै आएको छ । श्रवणदृष्टिविहीनता सम्बन्धि समस्याको पहिचान नै हुन नसकेको अवस्थामा संघले त्यस्ता बालबालिकाहरुको संरक्षण गर्ने, क्षमता अभिवृद्धि, आवश्यक शिक्षा ,स्वास्थ्यको समेत प्रबन्ध गर्ने गरेको छ । त्यस्ता परिवारलाई राहत वितरण गर्ने साथै अनलाइन माध्यममा जोडिन सक्ने वर्गलाई अनलाइन थेरापी सेवा समेत प्रदान गरेको बताइएको छ ।
बिहिबार विराटनगरमा एक कार्यक्रम गर्दै “नेपालमा श्रवणदृष्टिविहीनता भएकाहरुका लागी स्वस्थ जिवन” कार्यक्रम अन्तर्गत हाल १२ जना श्रवणदृष्टिविहीनताको समस्या भएका बालबालिकाले सेवा प्राप्त गरिरहेको बताइएको छ । जोआ, सेन्स युके, सेन्स इन्डिया र राष्ट्रिय बहिरा महासंघ नेपालले समेत यस ३ बर्षे परियोजनाका लागि सहयोग गरेका छन् ।
संघको यस कार्यक्रमले आफूले श्रवणदृष्टिविहीनताको समस्याबारे जानकारी पाउनुका साथै यसबाट बालबालिकामा निकै परिवर्तन आएको अभिभावकको भनाइ रहेको छ ।
कार्यक्रममा बोल्दै राष्ट्रिय बहिरा महासंघ,नेपालका तालिम अधिकृत अस्मिता शाक्यले यो एक पृथक वर्गको अपाङ्गता भएकाले यस्ता समस्या भएका बालबालिकालाई सिकाउने माध्यम फरक रहेको र लामो समय समेत लाग्न सक्ने बताइन् । उनले हरेक कुराहरुबाट अनभिज्ञ भएको हुँदा स–साना कुरालाइ समेत विशेष महत्वका साथ बालबालिकालाइ प्रशिक्षण दिनुपर्ने आवश्यकता रहेको बताइन् ।
यस्तै कोशी बहिरा संघका अध्यक्ष सुनिता तिवारीले यस्ता कार्यक्रमले श्रवणदृष्टिविहीनताको क्षेत्रमा ठूलो भुमिका खेल्ने भन्दै आगामी दिनमा थप कार्यक्रम गर्दै लैजाने बताइन् । उनले यस्ता समस्या भएकाहरुको क्षेत्रमा स्थानीय तथा प्रदेश सरकारले समेत सहयोग गर्ने अपेक्षा रहेको बताएकी छन् ।
कार्यक्रममा बालबालिकाहरुको परिवारलाई खाद्यान्न तथा सिकाइ सामाग्री समेत प्रदान गरिएको थियो । मोरङका विभिन्न गाउँपालिका ,नगरपालिकालाई समेत सहभागी बनाइएको कार्यक्रम फलदायी हुने अपेक्षा गरिएको छ ।
कार्यक्रममा विराटनगर महानगर शिक्षा महाशाखा प्रमुख दुर्गाप्रसाद खतिवडा , कोशी बहिरा संघका महासचिव रन्जन निरौला,कोषाध्यक्ष जीवन दाहाल,सचिव गीता बस्नेत र परियोजना संयोजक प्रशान्त दुलाल,दोभाषे सन्तोषी घिमिरे ,श्रवणदृष्टिविहीन प्रशिक्षक गोमा कार्की लगायतको सहभागिता रहेको थियो ।
ताप्लेजुङको पाथीभरा क्षेत्रमा हिमपात
नेपालमै पहिलो पटक बालविकास सम्वन्धि अन्तर्राष्ट्रिय सम्मेलन हुने
ग्रेटर नेपाल अभियानका फणिन्द्र नेपाल पक्राउ
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
