featured photo: Birat Post

काठमाडौं, १७ चैत । जनता समाजवादी पार्टी (जसपा) नेपालमा अध्यक्ष एवं पूर्व उपप्रधानमन्त्री उपेन्द्र यादवले अहिले दुई ठूला दल नेपाली कांग्रेस र नेकपा (एमाले) को सरकार भएपनि राष्ट्रिय समस्या समाधान हुन नसकेको बताएका छन् । आज (आइतबार) रिपोर्टर्स क्लब नेपालको २७औं वार्षिकोत्सव समारोहलाई सम्बोधन गर्दै उनले कांग्रेस–एमालेको सरकार बनेको ९-१० महिना लागिसक्दा पनि एउटा पनि ठोस काम हुन नसकेको बताए । उनले सरकार कमजोर भइरहेको अवस्थामा व्यापक रुपमा भ्रष्टाचार, अनेकौं काण्ड र विचौलियाहरुको रामाराज्य नै रहेको बताए ।

‘कांग्रेस र एमाले दुई ठूला दलका सरकार भएपनि राष्ट्रिय समस्यालाई समाधान गर्न सरकार अत्यन्त कमजोर देखिएको छ । ९÷१० महिना हुन लागिसक्यो, एउटा पनि ठोस काम गर्न सकेको छैन । सरकार कमजोर भएको अवस्था, देशमा व्यापक रुपले भ्रष्टाचार र काण्डहरु भइरहेको अवस्था, कमिशनतन्त्र, लुटतन्त्र, विचौलियाको त राज्य नै छ । विचौलियातन्त्र हुने, सकार कमजोर हुने र जनतामा आक्रोश र निराशा छ,’– उनले भने ।

सरकारले सुशासन दिन नसकेको, विकास र समृद्धिलाई अगाडि बढाउन नसकेको, कमिशनतन्त्र र विचौलियातन्त्रको बोलवाला रहेको उनको आरोप छ । अध्यक्ष यादवले सरकारको कारण जनतामा निशारा र आशोक्र बढेको र यही फाइदा उठाएर लोकतन्त्रविरोधी तत्वहरु सल्बलाएको दाबी गरे । अध्यक्ष यादवले सरकार सुशासन दिन, विचौलिया र भ्रष्टतन्त्रलाई नियन्त्रण गर्न र राष्ट्रिय समस्याको समाधान गर्नेतर्फ पनि लाग्नुपर्ने बताए ।

वर्तमान संविधान संविधान सभाले नबनाएर गलत तरिकाले आएको उनको दाबी छ । संविधान सभाको मञ्चलाई प्रयोगमात्रै गरेर संविधान जारी गरिएको उनले बताए । ‘यो गलत तरिकाबाट आएको संविधान हो । संविधान सभाले बनाएको संविधान नै होइन । संविधान सभाको मञ्चलाई प्रयोग गरेर घोषणा गरेको संविधान हो यो । संविधान घोषणा भएको दिन दुई चार जनाले काठमाडौंमा बत्ति बाले होलान् । सबै समुदायको संविधान बनाउन सकिएन भने यो संविधानले धान्न सक्दैन,’– उनले भने ।

सम्बन्धित

सुनको मूल्य तोलामा ३९०० घट्यो

एउटा दलको निरङ्कुश सत्ता विरुद्ध अर्को दलले आन्दोलन गर्न कठिन भए पनि गाह्रो चाहिँ हुन्न : राप्रपा नेता बल्लभ दाहाल

शान्तिपूर्ण आन्दोलन गर्ने अधिकार सबैलाई छ : डा.शेखर कोइराला

हिन्दू राष्ट्र र राजाको प्रचार सामाग्री बनाएको आरोपमा पक्राउ