Birat Post मंगलबार, साउन ०८, २०८१ मा प्रकाशित
विराटनगर,८ साउन ।
केन्द्रमा नेपाली कांग्रेस र नेकपा एमालेबीच सत्ता गठबन्धन भएसँगै प्रदेशहरुमा पनि सरकार परिवर्तनको लहर चलेको छ । कोशी प्रदेशमा एमाले नेतृत्वमा कांग्रेस सहभागी बन्दै छ । यो पुनर्गठन मात्र हो । सोअनुसार एमाले नेतृत्वमा रहेका अन्य दलका मन्त्रीहरु छिट्टै बर्खास्तीमा पर्नेछन् ।
केन्द्र सरकारबाट बाहिरिएको भए पनि माओवादी केन्द्रले भने कोशी सरकार छाडेको छैन । उसले देखाएको व्यवहारका विषयमा मिडियावाजी देखि जनस्तरमा चर्चाको विषय बन्ने गरेको छ । सामान्य राजनैतिक नैतिकता माओवादीले नदेखाएको भन्दै आलोचना समेत भएको छ ।
कांग्रेस सरकारमा जाने भएसँगै मुख्यमन्त्री एवं एमाले संसदीय दलका नेता हिक्मतकुमार कार्कीले अन्य दलका मन्त्रीहरुलाई बर्खास्त गर्नेछन् । ९ वटा मन्त्रालय मध्ये भागवण्डा कसरी लगाउने भन्ने विषय टुङ्गो लाग्न सकेको छैन । पाएको समुहगत भागवण्डामा कांग्रेस भित्रै किचलो हुने देखिएको छ । भनेअनुसार ५ मन्त्रालय कांग्रेसको भागमा परे समुहगत समस्या मिलाउन कांग्रेसलाई केही सहज हुने छ ।
देउवा समूह, डा.शेखर कोइराला समूह र कृष्णप्रसाद सिटौला समूह कोशीमा हावी रहेको छ । सिटौला समूहबाट प्रदेशमा नेपाली कांग्रेस केन्द्रीय सदस्य भीम पराजुली, कोशीका महामन्त्री भुपेन्द्र राई, पूर्व प्रमुख सचेतक गोपाल तामाङको नाम चर्चामा रहेको छ । शेखर कोइराला समूहबाट पुराना मन्त्रीहरुले दोहोर्याउन चाहेका छन् । यद्यपी कोइराला समूहबाट गोविन्द गिरी (इलाम) र मानबहादुर लिम्बू (मोरङ) लाई मन्त्री बनाउन दबाब रहेको छ ।
त्यस्तै इन्दिरा थापा, रामकुमार खत्री लगायतका सांसदहरु पनि मन्त्री बन्न पाउनु पर्ने भन्दै लबिङ तीव्र पारिरहेका छन् । त्यस्तै देउवा पक्षबाट केन्द्रीय सदस्य प्रदीपकुमार सुनुवार लगायतले मन्त्री बन्न आतुर देखिएका छन् । उनी तीन पटक मन्त्री भइसकेका छन् । ९३ सदस्यीय प्रदेशमा एमालेले ४०, कांग्रेसले २९, माओवादीले १३, राप्रपाले ६, नेकपा एसले ४ तथा जसपाले १ सिट जितेको छ ।
ताप्लेजुङको पाथीभरा क्षेत्रमा हिमपात
नेपालमै पहिलो पटक बालविकास सम्वन्धि अन्तर्राष्ट्रिय सम्मेलन हुने
ग्रेटर नेपाल अभियानका फणिन्द्र नेपाल पक्राउ
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
