Birat Post बिहिबार, बैशाख २७, २०८१ मा प्रकाशित
विराटनगर,२७ बैशाख। मोरङको बूढीगंगा गाउँपालिका–६ घर भएका एक जना बालकको माटोको ढिस्कोले पुरिएर मृत्यु भएको छ । बूढीगंगा–६ सखुवा टोलका रामप्रकाश चौधरीका छोरा १० वर्षीय जयप्रकाश चौधरीको बूढीखोला किनारमा माटोको ढिस्कोले पुरिएर मृत्यु भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए । जयप्रकाश स्थानीय बोर्डिङ स्कुलको कक्षा ३ मा पढ्थे । स्कुलबाट घर आएर उनी बुधबार साँझ ५ बजेतिर साथीहरुसँग खेल्नलाई घरनजिकको बूढीखोला किनारमा गएका थिए ।
डीएसपी बस्नेतका अनुसार खेल्ने क्रममा ढिस्को खसेर उनलाई पुरेको पाइएको छ । जयप्रकाशलाई माटोले पुरेको भएपनि त्यसको जानकारी समयमा प्राप्त हुन सकेन । सँगै खेल्न गएका साथीहरुले पनि कसैलाई खबर गरेनन् । जयप्रकाशसँग खेल्न गएकाहरु ८–९ वर्षका बालक रहेको प्रहरीले जनाएको छ ।
ढिस्को खसेर साथीलाई पुरेपछि चुपचाप उनीहरु घर फर्किएका थिए । तर, अभिभावकदेखि कसैलाई पनि नभनेका कारण लामो समयसम्म जयप्रकाश मोटोभित्रै पुरिए । पछि थाहा पाएर अभिभावक पुग्दा पुरिएकै ठाउँमा उनको मृत्यु भइसकेको पाइएको प्रहरीले जनाएको छ ।
डीएसपी बस्नेतका अनुसार माटोले पुरिएको सूचना समयमा नआएकै कारण उद्धार गर्न नपाएर बालकको मृत्यु भएको प्रारम्भिक अनुसन्धानबाट खुलेको छ । ‘बेलैमा थाहा भएको भए उद्धार गरेर बचाउन सक्ने अवस्था रहन्थ्यो । सँगै खेल्न गएका साथीहरुले पनि जयप्रकाशलाई माटोको ढिस्कोले पुरेको जानकारी अभिभावकलाई गराएनछन्,’ उनले भने ।
घटना देखेर डराएकै कारण अन्य बालकहरुले बेलैमा जानकारी नगराएको हुनसक्ने प्रहरीको अनुमान छ । जयप्रकाश अवेरसम्म घर नफर्किएपछि अभिभावकले खोजी सुरु गरेका थिए । खोजी सुरु गरेपछि मात्रै जयप्रकाशसँग खेल्न गएकाहरुले घटनाको जानकारी दिएर अभिभावकलाई घटनास्थल पुर्याएका हुन् ।
प्रहरीका अनुसार अभिभावकले थाहा पाएर घटनास्थल पुग्दा रातको ९ बजेको थियो । बुवा रामप्रकाश पुगेर हेर्दा छोरा जयप्रकाशलाई माटोको ढिस्कोले पुरिरहेको अवस्थामा फेला पारेर बाहिर निकालेका थिए । तर, उनको घटनास्थलमै मृत्यु भइसकेको थियो । राति ९ः३० बजेतिर विराट शिक्षण अस्पताल पुर्याए पनि चिकित्सकले उनलाई मृत घोषित गरिदिए ।
विराटनगरस्थित कोशी अस्पतालमा पोस्टमार्टम गरी शवलाई अभिभावकको जिम्मा लगाएर प्रहरीले घटनाको अनुसन्धान सुरु गरेको छ । घटनास्थलमा पुगेर जिल्ला प्रहरी कार्यालय मोरङका इन्सपेक्टर हेमराज ओली नेतृत्वको टोलीले घटनाको अनुसन्धान अघि बढाएको छ । डीएसपी बस्नेतका अनुसार अनुसन्धानपछि घटनाका बारेमा थप प्रष्ट हुने छ ।
ताप्लेजुङको पाथीभरा क्षेत्रमा हिमपात
नेपालमै पहिलो पटक बालविकास सम्वन्धि अन्तर्राष्ट्रिय सम्मेलन हुने
ग्रेटर नेपाल अभियानका फणिन्द्र नेपाल पक्राउ
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
