Birat Post बिहिबार, बैशाख १३, २०८१ मा प्रकाशित
काठमाडौँ ,३ वैशाख । उपप्रधान तथा गृहमन्त्री एवं राष्ट्रिय स्वतन्त्र पार्टीका सभापति रवि लामिछानेको सहकारी प्रकरणलाई लिएर सामाजिक सञ्जालमा टिप्पणी वा कुनै पनि कमेन्ट गर्न नहुने भएको छ ।
फेसबुकमा सामान्य कमेन्ट गरेको आधारमा उनको सचिवालयले प्रहरीमा उजुरी गर्ने र प्रहरीले सर्वसाधारणलाई धरपकड गर्ने, अनावश्यक दुःख दिने लगायतका कार्य गर्दा एक युवकले विष सेवन गरेर आत्महत्याको प्रयास गरेका छन् ।
बुधबार दिउँसो प्रहरीको साइबर ब्युरोकै ढोकामा विष सेवन गर्दा एक युवाको झण्डै ज्यान गएको थियो । जाजरकोट कुशे गाउँपालिका स्थायी घर भएका गणेशमान सिंहलाई साइबर ब्युरोले पक्राउ गरी गृहमन्त्री रवि लामिछाने विरुद्ध किन कमेन्ट गरेको भन्दै मानसिक तनाव दिँदा ब्युरोकै ढोकामा विष सेवन गरेर आत्महत्याको प्रयास गरेका थिए ।
उनले विष सेवन गरेपछि प्रहरीले वीर अस्पताल पुर्याएको थियो । वीर अस्पतालमा उपचार हुन नसकेपछि राति नै कीर्तिपुरको बर्न अस्पतालको आईसीयूमा भर्ना गरिएको छ ।
हाल उनको बर्न अस्पताल कीर्तिपुरमा उपचार भैरहेको उनका भाइ मानबहादुर सिंहले बताए । उनको अवस्था अहिले चिन्ताजनक रहेको पनि सिंहले जानकारी दिए ।
पीडितले दुई तीन महिना अगाडि फेसबुकमा कमेन्ट गरेका भरमा साइबर ब्युरोले बोलाएर आफूलाई दुःख दिएकोसमेत बताएका छन् । ‘मोबाइल लिन आइज भनेर तँलाई जेल हाल्छु ६–७ वर्ष गृहमन्त्रीको विरुद्ध बोल्ने ? सहकारी ठगीको तँसँग के प्रमाण छ ? साइबर ब्युरोले मलाई हजारौँ प्रश्न सोध्यो’ पीडितले भने ।
‘अरु कोहीले फेसबुकमा राखिएको सामग्रीमा दाजुले सहकारी ठगी प्रकरणमा कमेन्ट गर्नुभएको रहेछ त्यही आधारमा प्रहरीले दुई पटक बोलाएर प्रमाण लिएर आइज नत्र जेल हाल्छौँ भनेछन् अरुले उजुरी गरेको देखिएन गृहमन्त्रीको आदेश छ १० वर्ष जेल हाल्छौ भनेर प्रहरीले धम्की दिएपछि बाँच्नुभन्दा मर्नु नै वेश भनेर विष सेवन गरेको देखियो’, पीडितका भाइ मानबहादुरले भने ।
गृहमन्त्री र उनको सचिवालयले अघोषित रूपमा सुरक्षा निकायको दुरूपयोग गरी विचार अभिव्यक्तिमाथि प्रतिबन्ध लगाएर ज्यान लिने कोसिस गरेका छन् । साइबर ब्युृरोकै ढोकामा विष सेवन गरेर आत्महत्या गर्नुपर्ने अवस्थामा पुगेपछि केन्द्रीय प्रहरी कार्यालयले विशेष चासो राखेको थियो ।
त्रिभुवन विश्वविद्यालयबाट एमए गरेका सिंह अहिले लोकसेवाको तयारी गरिरहेका थिए । उनले सहकारी ठगीको विषयमा रविले प्रष्टीकरण दिनुपर्ने भन्दै सामाजिक सञ्जालमा गरेको पोष्टलाई लिएर प्रहरीले अनावश्यक रुपमा मानसिक तनाब दिएको थियो ।
‘रवि लामिछानेविरुद्ध किन लेखेको भनेर पाँच जना प्रहरीले घेरा हालेर टर्चर दिएका रहेछन्’, उनका भाइ मानबहादुरले भने । उनका भाइले दाजुको फेसबुक पेजमा ११ घण्टा अघि पुरानो कमेन्टमा अरुले नै सम्पादन गरेकोसमेत दाबी गरेका छन् ।
‘मोबाइल प्रहरीले लगेको थियो, त्यहाँ तीन पटक सम्पादन गरेको देखिन्छ’, उनले भने । प्रहरीले सिंहको मोबाइल पनि नियन्त्रणमा लिएर राखेको थियो ।
उनलाई तीन दिनअघि पहिलो चोटी बोलाएको थियो भने बुधबार दोस्रो पटक बोलाएर जेलमै सडाउने धम्की दिइएको पनि उनका भाइ मानबहादुरले बताए ।
सहकारी ठगीका किङ भनेर चिनिएका गितेन्द्रबाबु राई (जीबी) र रवि लामिछाने दुवै जना सञ्चालक रहेको गोर्खा मिडियामा सहकारीले गरेको कराडौँ लगानी डुबेको छ ।
ग्यालेक्सी टीभी सञ्चालन गर्दा आफैँ सञ्चालक समिति रहेका लामिछानेले सुप्रिम, सूर्यदर्शन लगायतका सहकारीबाट करोडौँ रुपैयाँ आफ्नै नाममा ऋण लिएर सर्वसाधारणको रकम अपचलन गरेका थिए ।
लाखौँ सहकारी पीडितहरु अन्यायमा परेका बेला सहकारीको रकम ठगीबारे प्रश्न गर्ने एक सर्वसाधारणलाई सुरक्षाकर्मी लगाएर विष सेवन गर्ने परिस्थितिमा पुर्याएका छन् ।
सरकारको कुकृत्य झल्किँदै–
साइबर व्युरोले थर्काउने शैलीमा पीडितलाई भनेझैँ यदि सहकारी ठगीमा रविको दोष छैन भने उनले अहिलेसम्म किन छानबिनका लागि स्वीकृति दिन सकेका छैनन् ? यस विषयमा प्रमुख प्रतिपक्ष दलसहित सत्ता बाहिर रहेका दलहरुले संसदमा रविवरुद्ध छानबिन गर्न संसदीय छानबिन समिति बनाउन भनिरहेका छन् ।
रविले छानबिन समिति बने सरकार छाडिदिन्छु भनेर घुर्की लगाउने अनि प्रधानमन्त्री पुष्पकमल दाहाल प्रचण्डले केही हुँदैन म छु नि भनेर भरथेग गर्ने अनि एमाले अध्यक्ष केपी शर्मा ओलीले काँध थापिरहँदा अहिलेको परिस्थिति सिर्जना भएको हो । शंका भएपछि छानबिन समिति बनाउनु पर्छ भनेर कुर्लने तिनै रवि थिए ।
तर जब आफूमाथि विवाद आइलाग्यो तब अहिले उनी र उनको दल नै पन्छिएको छ । यसबाट उनी दोषी रहेको स्वयं पुष्टि गर्दै गइरहेका छन् । र यसरी शक्तिको दुरुपयोग गरी सचिवालयले साइबर ब्युरोको प्रयोग गर्नुले पनि शंकाको लाभलाई थप बल पुगेको छ । प्रचण्ड सरकारको सुशासनसमेत यसबाट छर्लङ्गै भएको छ ।
दुर्गा प्रसाईंलाई अदालतमा उपस्थित गराइयो
सेना परिचालनका लागि अपनाउनुपर्ने विधि सिफारिस
रंगेलीमा ड्रागन फल खेतीबाट राम्रो आम्दानी गर्दै कृषक
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
