Birat Post शुक्रबार, माघ १२, २०८० मा प्रकाशित
काठमान्डौं,१२ माघ । राम्रोसँग निद्रा नपर्ने व्यक्तिमा मस्तिष्कको सोच्ने–सम्झिने क्षमतामा असर पुग्न सक्ने एक अध्ययनले देखाएको छ ।
अखिल भारतीय आयुर्विज्ञान संस्थान (एम्स) को स्नायुविज्ञान विभागको नेतृत्वमा भएको अध्ययनले भारतमा १० मध्ये एक व्यक्ति राम्रोसँग निद्रा नलाग्ने समस्याबाट प्रभावित रहेका र त्यस्ता व्यक्तिमा मस्तिष्कको कार्यक्षमतामा असर पुग्ने गरेको देखाएको हो ।
राम्रोसँग निद्रा नपर्ने समस्या भएका मानिसहरूको मस्तिष्कको कार्यक्षमता निद्राको समस्या नभएका मानिसहरूको तुलनामा कम पाइएको एम्सको स्नायुविज्ञान विभागका प्रमुख डा. कामेश्वर प्रसादले बताउनुभयो । रातिमा पटक–पटक बिउँझिने समस्या निद्रामा श्वासप्रश्वास राम्रोसँग नहुनुका कारण देखिन्छ । निद्रा पूरा नहुँदा शरीरमा असर पुग्ने र दैनिकीमा पनि प्रभाव पर्ने अध्ययन प्रतिवेदनमा उल्लेख छ ।
यस्तै घुर्ने समस्याले पनि निद्रामा असर गरेको पाइएको छ । घुर्नबाट रोक्न तौलमा नियन्त्रण राख्न र सुत्नुअघि नाक सफा गर्न विज्ञहरूको सुझाव छ ।
सुत्ने बानी बेहोरामा केही सुधार गरे मानिसहरूले आफ्नो शरीरको घडीमा परिवर्तन गर्न सक्ने र स्वास्थ्यमा सुधार गर्न सक्ने वैज्ञानिकहरूले बताएका छन्।
यूके र अस्ट्रेलियाका अनुसन्धानकर्ताहरूले राति नसुतीकन सक्रिय रहने मानिसहरूमा एक अध्ययन गरेका थिए। उनीहरूका अनुसार सधैँ एउटै निश्चित समयमा सुत्ने गरेमा, क्याफिन नखाएमा र बिहान पर्याप्त घाममा बसेमा निद्रासम्बन्धी समस्या निराकरण गर्न सकिन्छ।
सुन्दा सामान्य लागे पनि यो शैली अनुकरण गरे यसले महत्त्वपूर्ण प्रभाव पार्न सक्ने उनीहरूको धारणा छ। सबै मानिसको शरीरमा एउटा ‘जैविक घडी’ हुन्छ। त्यो सूर्योदय र सूर्यास्तसँग अनुकूल भएको हुन्छ। त्यसैले हामीलाई उज्यालो नभएको रातिको समयमा निद्रा लाग्ने गर्छ।
तर केही मानिसको घडी अरूको भन्दा ढिलो चल्छ। केही मानिस बिहान सबेरै उठ्छन् र उनीहरूलाई राति जागा बस्न गाह्रो हुन्छ।
तर राति सक्रिय हुने मानिसमा यो प्रकृया उल्टो हुन्छ। उनीहरूको समस्या भनेको के हो भने आफ्नो शरीर तयार हुनुभन्दा अगाडि नै अलार्मको सहयोगमा बिहान बिउँझनुपर्छ।
सधैँ राति जागा बस्ने मानिसमा स्वास्थ्यको समस्या देखिने गरेको छ। वैज्ञानिकहरूले उल्लूजसरी रातभरि जागा बस्ने अर्थात राति निद्रा नलाग्ने चर्को समस्या भोगिरहेका २१ जना व्यक्तिमा अध्ययन गरेका थिए। सरदर उनीहरू बिहान साढे दुई बजे मात्रै सुत्थे र बिहान १० बजेसम्म उठ्दैनथे।
उनीहरूलाई यस्तो निर्देशन दिइयो
पहिलाभन्दा २/३ घण्टा अगाडि उठ्ने र बिहान बाहिर गएर पर्याप्त उज्यालोमा बस्ने
सकेसम्म चाँडै विहानको खानेकुरा खाने
बिहान मात्रै शारीरिक व्यायाम गर्ने
सधैँ एउटै समयमा दिउँसोको खाना खाने र राति सात बजेपछि केही नखाने
दिउँसो तीन बजेपछि क्याफिन भएको पेयपदार्थ सेवन नगर्ने
दिउँसो चार बजेपछि छोटो समयका लगि भएपनि नसुत्ने
पहिलाभन्दा २/३ घण्टा अगाडि सुत्ने र राति सुत्ने ठाउँमा धेरै उज्यालो हुन नदिने
प्रत्येक दिन उही समयमा सुत्ने र उही समयमा उठ्ने
युनिभर्सिटी अफ बर्मिङ्घम, युनिभर्सिटी अफ सरी र मोनाश युनिभर्सिटीले गरेको विश्लेषणमा तीन हप्तापछि यो निर्देशन पालना गर्ने मानिसको जैविक घडीमा दुई घण्टाले सुधार भएको देखायो।
स्लीप मेडिसिन नामक जर्नलमा प्रकाशित शोधमा ती मानिसहरू उति नै घण्टा सुत्न सकेको उल्लेख छ।
युनिभर्सिटी अफ सरीमा प्राध्यापन गर्ने डेब्रा स्किनी भन्छीन्, सामान्य दैनिकी बनाउँदा राति निद्रा नपर्नेहरूलाई पनि आफ्नो शरीरको घडी अनुकूल पार्न र समग्रमा आफ्नो शारीरिक र मानसिक स्वास्थ्य सुधार्न सहयोग पुग्यो।
शरीरले प्रकाशप्रति विशेष प्रतिक्रिया देखाउँछ। तसर्थ शरीरलाई दिउँसो धेरै र राति कम प्रकाश देखाउनुपर्छ। सुत्ने र उठ्ने समयमा एकरूपता नहुँदा पनि शरीरको जैविक घडी अलमलिन्छ। यो अध्ययनमा प्रयोग गरिएको विधि सामान्य सुझावजस्तो लागे पनि यो पालना गर्दा शरीरको घडीलाई अनुशासित बनाउन सहयोग पुग्छ।
अनुसन्धनकर्ताहरूलाई ढिलो सुत्ने बानी परेकाहरूमा कस्तो प्रभाव पर्छ भन्ने थाहा थिएन। युनिभर्सिटी अफ बर्मिङ्घमका डा. एन्ड्रयू ब्याग्शोका अनुसार यी सामान्य कुरा जोसुकैले गर्न सक्छन् र त्यसबाट परिवर्तन पनि हुन्छ।
-एजेन्सी
ताप्लेजुङको पाथीभरा क्षेत्रमा हिमपात
नेपालमै पहिलो पटक बालविकास सम्वन्धि अन्तर्राष्ट्रिय सम्मेलन हुने
ग्रेटर नेपाल अभियानका फणिन्द्र नेपाल पक्राउ
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
