विराटनगर,२ बैशाख / नेपाली कांग्रेस विराटनगर १२ नम्बर वडा समितिले कवि एवं पत्रकार मीनकुमार नवोदितसहित विभिन्न क्षेत्रमा योगदान पुर्याउने व्यक्तिहरुलाई सम्मान गरेको छ ।
वडाका बासिन्दा नवोदित नेपाल प्रेस युनियनको कोशी प्रदेश अध्यक्षमा निर्वाचित भएकाले सम्मान गरिएको वडा सभापति हरिनारायण यादवले बताए । कार्यक्रममा नवोदितलाई नेपाली कांग्रेसका नेता डा. शेखर कोइरालाले दोसल्ला ओढाएर सम्मानपत्र प्रदान गरेका थिए । साहित्य र पत्रकारितामा दुई दशकभन्दा लामो समयदेखि सक्रिय नवोदित विराटनगरमा भएको प्रदेश अधिवेशनबाट अध्यक्षमा सर्वसम्मत निर्वाचित भएका थिए ।
त्यसैगरी सोही अवसरमा हिसानका केन्द्रीय उपाध्यक्ष भेषराज पोखरेललाई पनि सम्मान गरिएको थियो । वडाको पार्टी कार्यालय सञ्चालनका लागि आर्थिक सहयोग गरेका पोखरेल पनि वडाका बासिन्दा हुन् । त्यस्तै ज्येष्ठ नागरिक एवं लामो समय कांग्रेसको क्रियाशील सदस्य रही पार्टीलाई महत्वपूर्ण सहयोग गर्ने फागु ऋषिदेव, भोलु राजवंशी, दिनानाथ बन्जरा खोचीदेवी सरदार र नन्दु मण्डललाई सम्मान गरेको छ ।