featured photo: Birat Post

विराटनगर,१३ चैत ।
तराइका जिल्लाहरुमा श्रद्धा र निष्ठापूर्वक मनाइने चैते छठ पर्व मनाइँदै छ । यसलाई वासन्ती छठ पनि भनिन्छ ।

चैते दशै जस्तै छठ पर्व पनि चैतमा पनि मनाइन्छ । चैत शुक्ल चतुर्थीदेखि सप्तमीसम्म चार दिन विभिन्न विधिसाथ मनाइने पर्वको आज तेस्रो दिन बर्तालुले निराहार व्रत सुरु गरेका छन् ।

यसअघि गत शनिबार चैत शुक्ल चौथी (चतुर्थी) का दिन पवित्र स्नान गरेर शुद्ध खाने विधिबाट पर्व प्रारम्भ गरेका बर्तालुले आइतबार पञ्चमी तिथिमा ‘खरना’ विधि सम्पन्न गरिसकेका छन् ।

निराहार व्रत रही आज सोमबार साँझ पवित्र जलाशयमा बनाइएको घाटमा गई अस्ताउँदो सूर्यलाई (अर्घ) दिने र सूर्यदेव चढाएको सामान अर्पण गरिन्छ । ंसप्तमी तिथि अर्थात मंगलबार बिहान उदाउँदो सूर्यलाई अर्घ दिए पछि बर्तालुले व्रत समापन गर्नेछन् ।

शरद र वसन्त ऋतु दुवैमा मानिसहरुले छठ पर्व मनाउने परम्परा छ । यो सूर्य उपासनाको व्रतको प्रभावले हरेक मनोकामना पूरा हुने विश्वास गरिन्छ ।