Birat Post आइतबार, पुष १७, २०७९ मा प्रकाशित
विराटनगर,१७ पुष । नेपाली कांग्रेसका केन्द्रीय सदस्य तथा प्रदेश सांसद अमृत अर्यालले कांग्रेसको राजनीतिमा लामो समय खर्चेका कार्यकर्ता र नेताहरूका विरूद्ध हुने हरेक षड्यन्त्रको विरूद्ध देशब्यापी प्रतिकार सुरू गरिने बताएका छन् । यसको सुरुवात भएको छ ,अब देशब्यापीरुपमा असर देखिन थाल्छ ।
विराटपोष्ट संग कुरा गर्दै अर्यालले टेक्निकल गेम गरेर कार्यकर्ता तथा नेताहरू माथि छिचो,मिचो गरिरहेकाहरु विरुद्ध अब बुलन्द आवाज उठाउने अभियानमा सक्रिय रहने बताए ।
गत शुक्रबार भएको संसदीय दलको नेतामा पराजय भए सगै अर्याल आक्रामक देखिए । उनले शनिबार मात्रै पत्रकार सम्मेलन गरी निवर्तमान सूचना तथा सञ्चारमन्त्री ज्ञानेन्द्रबहादुर कार्की आफुलाई हराउन लागेको किटान गरे । कार्कीकै योजना अनुरुप आफूलाई हराइएको उनको स्पष्टोक्ति थियो ।
हार्छु भन्दा भन्दै पनि ,सूचना पाउदा पाउदै पनि नेतृत्वको छिचो,मिचो विरूद्ध लड्न मसाल उठाएको अर्यालले बताए ।
प्रदेश १ संसदीय दलको नेता छान्न समन्वय गर्ने जिम्मेवारी पाएका कार्कीले सांसदहरूलाई प्रेसर दिएको तथा आफूलाई डिस्करेज गरेको उनको आरोप छ ।
आफ्नो पक्षमा थोरै मत आउँछ भन्ने पूर्वजानकारी ४ दिन अगाडि नै भए पनि पार्टीभित्र भएको अन्यायविरुद्ध दलको नेताका लागि प्रतिस्पर्धामा आएको उनले दाबी गरे ।
‘नेताहरूले प्रदेशसभा सदस्यहरूलाई धम्की दिएर भोट नहाल्न दबाब दिएको मसँग प्रमाण छ’, अर्यालले भने, ‘मलाई भोट नहाल्न भन्दै ४ जना नेताहरूले धम्की दिएका रहेछन् ।’
ज्ञानेन्द्रबहादुर कार्कीप्रति आक्रोशित देखिएका अर्यालले पार्टीको जिम्मेवार नेताको रूपमा काम गर्न नसकेको आरोपसमेत लगाए । कार्कीकै कारण नेपाली कांग्रेसले सरकार गुमाउनु परेको उनको जिकिर थियो ।
शुक्रवार भएको कांग्रेस प्रदेश १ संसदीय दलको चुनावमा उनले दुई मत मात्रै प्राप्त गरेका थिए । संसदीय दलको चुनावमा तीन जना उम्मेदवार थिए । संस्थापन पक्षका अर्याल, नेता कृष्णप्रसाद सिटौला पक्षका उद्धव थापा र संस्थापनइतर पक्षका केदार कार्कीबीच प्रतिस्पर्धा भएको थियो । दलको नेतामा १८ मत ल्याएर थापा निर्वाचित भए भने कार्कीले ९ मत र अर्याल २ मत पाएका थिए ।
दुर्गा प्रसाईंलाई अदालतमा उपस्थित गराइयो
सेना परिचालनका लागि अपनाउनुपर्ने विधि सिफारिस
रंगेलीमा ड्रागन फल खेतीबाट राम्रो आम्दानी गर्दै कृषक
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
