featured photo: Birat Post

मोरङ, १३ चैत्र ।

विराटनगर महानगरपालिका वडा नं १० निवासी मोहनकुमार रौनियारका ३० वर्षीय छोरा अमित रौनियार भारतको चलचित्र नगरी मुम्बईमा आफ्ना स्थान बनाउन थालेका छन् । दश वर्ष अघि भारतको नयाँ दिल्लीमा चाटर्ड एकाउन्ट पढ्न गएका युवा अमित कलाकारिता क्षेत्रमा अव्बल बन्दै गएका छन् । लगातारको मेहनतबाट उनी भारतको चलचित्रमा जम्न सफल भएका छन् ।

हिन्दी वेव सिरिज ‘ए दिल है मुस्किल’, दक्षिण भारतीय कन्नड भाषाकाको ‘रामाचारी टु पेन जिरो ’(रामायण कथामा आधारित) , हिन्दी चलचित्र मि. तेज, अर्को नाम घोषणा नभएको हिन्दी चलचित्र, हिन्दी भाषाको वेभ सिरिज लगायतमा अमित रौनियारले अभिनय गरिसकेका छन् ।
यसैगरी अमितले अभिनय गरेको ‘तेरा लव मेरा इश्क’ गीतको भिडियो भारतको प्रसिद्ध सङ्गीत कम्पनी टि सिरिजले चाँडै सार्वजनिक गर्न लागेको छ । रौनियारले सन् २०१३ मा मिस्टर एण्ड मिस दिल्लीमा बेस्ट फिजिक्स ,सन २०१७ मा मिस्टर उत्तराखण्डमा दोश्रो उपाधि हासिल गरेका छन् । इन्टरनेशनल फैसन शो बेस्ट मेल मोडलको उपाधि समेत ग्रहण गरेका अमित विराटनगर आउँदा उनका शुभचिन्तकहरुले भव्य स्वागत गरेका छन् ।