featured photo: Birat Post

विराटनगर, १२ असार ।
प्रदेश १ को प्रदेश सभा बैठकमा एकल पुरुषलाई भत्ताको व्यवस्था गर्न सांसदहरूले माग गरेका छन् । शुक्रबार शुन्य समयमा बोल्दै सांसद प्रतापप्रकाश हाङ्माङले एकल पुरुषलाई पनि सामाजिक सुरक्षा भत्ताको व्यवस्था गर्न प्रदेश सरकारसँग माग गरे । समानताको कुरा गर्ने तर, व्यवहारमा महिला र पुरुषलाई विभेद गर्ने काम भइरहेको उनको भनाई छ ।

हाङ्माङले भने ‘श्रीमान मरे भत्ता पाउने श्रीमति मरेचाहिं किन नपाउने ? ’ उनले कानुनमा समान भने पनि व्यवहारमा समानता नभएको गुनासो पनि गरे । हाङ्माङ्ले श्रीमतिको मृत्यु भएपछि गाउँघर तिर श्रीमानले काम पनि नपाउने ऋण पनि नपाउने अवस्था हुँदा धेरै एकल पुरुषको विजोग भइरहेको बताए । वैठकमा सांसद ओमप्रकाश सरावगीले प्रदेशमा विकास निर्माणमा धेरै ढिला सुस्ती भइरहेको भन्दै प्रदेश सरकारको ध्यानकर्षण गराए । धरान सडक र हुलाकी राजमार्ग निर्माणको काम धेरै ढिलाई भइरहेको सरावगीले बताए । हुलाकी राजमार्गको पुल ९ वर्षसम्म पुरा नहुँदा पनि प्रदेश सरकारले कुनै चासो नदेखाएको सरावगीको गुनासो छ । बैठकमा भूमिव्यवस्था, कृषि तथा सहकारी राज्यमन्त्री रामबहादुर मगरले संसदको शुन्य समयमा उठेका प्रश्नहरूको जवाफ दिएका छन् ।