featured photo: Birat Post

काठमान्डौ २३ फागुन /
स्थानीय निकायबाट सेवा प्रवेश गरेका कर्मचारीहरुले एक तह बढुवाको माग गरेका छन् । दुई नम्बर प्रदेश बारा र पर्सा जिल्लाका स्थानीय तह कर्मचारी संघ , स्थानीय तह कर्मचारी युनियन , नेपाल नगरपालिका एशोसिएसन लगायतको अगुवाइमा बिहीबार काठमान्डौं पुगी संघीय मामिला तथा सामान्य प्रशासन मन्त्रालयका सचिव सूर्यप्रसाद गौतमलाई १४ बुँदे ज्ञापनपत्र बुझाएका हुन् ।

कर्मचारी समायोजन गर्दा संघमा रहेका कर्मचारीलाई एक तह बढुवा र योग्यता नपुगेका कर्मचारीलाई दुई ग्रेड वृद्धि गरेर स्थानीय तह र प्रदेशमा पठाएको थियो । संघबाट प्रदेश वा स्थानीय तहमा समायोजन भएर कर्मचारी आउँदा जुनियर कर्मचारी पनि माथिल्लो तहमा पुगेको र सोही अनुरुप आफुहरुको समेत बढुवा हुनुपर्ने माग गरिएको छ । यस्तै स्थानीय तहका प्रमुख प्रशासकीय अधिकृत प्रदेश मातहत हुनुपर्ने माग समेत उनीहरुले राखेका छन् । यो माग स्थानीय तहमा काम गरिरहेका सवै कर्मचारीको साझा माग भएकाले पुरा गर्न समेत अपिल गरिएको स्थानिय तह कर्मचारी संघका सचिव गंगा साहले जानकारी दिए ।