featured photo: Birat Post

विराटनगर,१२ पुस ।
नेपाली कांग्रेसका केन्द्रीय सदस्य तथा कोशीका प्रदेश सभा सदस्य भीम पराजुलीले अल्पकालीन,मध्यकालीन र दीर्घकालीन विकासका योजनाहरु लक्षित समयमा पूरा हुन नसकेको भन्दै चिन्ता व्यक्त गरेका छन् ।

विराटनगरमा बिहिबार पत्रकारहरुसंगको भेटघाट कार्यक्रममा बोल्दै उनले छोटो–छोटो समयमा हुने राजनैतिक परिवर्तन र खिचातानीका कारण लक्षित विकासहरु ओझेलमा परिरहेको बताए । आफु विराटनगर महानगरको पूर्व मेयर भएको ,अहिले यही क्षेत्रको प्रदेशसभा सदस्य भएको नाताले पनि विकासका सवालमा आफुले चासो राख्ने गरेको बताए ।

उनले विराटनगर ,कटहरी र रंगेली हुलाकी सडकमार्गको विकासमा भएको ढिलासुस्ती,रेलवेको मुवाव्जा समस्या,कोशी अस्पतालको सेवा व्यवस्थामा देखिएको समस्या ,विराटनगर १९ को गिरिजाप्रसाद कोइराला क्रिकेट मैदान नवनेको ,कटहरी गाउँपालिकामा रहेको कृषि बजार अलपत्र अवस्थामा रहेको ,आगोलागी र भवितव्य घटनाको व्यवस्थापन र उपचारस्थलको अभाव रहेको ,हिजोका सरकारहरुले ल्याएका जनमैत्री कार्यक्रम र विकासका कामहरुको संरक्षण अभाव भएको लगायतका विषयहरु उठान गरेका थिए ।

सोही अवसरमा बोल्दै पराजुलीले पुराना सरकार तथा नेताहरुले गरेका हरेक विकासहरु नेताहरुको गोजीवाट नभइ नागरिकवाट उठेको कर र राज्यको सम्पती भएको भन्दै त्यसको संरक्षणमा लाग्नुपर्ने बताए । उनले भने, “कतिपय कुराहरु सुन्दै छु , विराटनगरको हिमालय रोडमा बनेको संरचना भत्काउने भनेर । त्यो म तत्कालिन अवस्थामा मेयर हुदा स्थानियको सहमतिमै निर्माण कार्य सुरु भएको हो । जुनरुपमा त्यो रोड बन्नुपर्ने हो अझै बनेको पनि छैन । किन त्यसमा ढिला सुस्ती भएको हो ,मैले बुझ्न सकेको छैन । पहिलेका मन्त्री,सांसद र मेयरले बनाएका संरचना नयाँ बनेका सरकारले भत्काउदै जाने त होइन होला ! ”

केही दिन यता हिमालय रोडका व्यवसायीहरु रोडलाई पुरानो आवस्थामा फर्काउनुपर्ने माग राख्दै आन्दोलन गरिरहेका छन् । यसमा स्थानिय घरवालाहरु भने बनेको रोडको विपक्षमा छैनन् । केही समुहले उचालेको भरमा आन्दोलन भइरहेको आरोप आन्दोलनकारीले खेपिरहेका छन् ।
यस्तै उनले यही अवस्थामा प्रदेश सरकारलाई अधिकारविहिन बनाइराख्न नहुने बताए ।

यही अवस्थामा प्रदेश सरकार रहनु र नरहनुको कुनै अर्थ रहदैन उनले भने, “संघीय सरकार यसमा लचिलो बन्न पर्छ ।” यस्तै हिन्दु राष्ट्रको एजेण्डा आफुले उठाउने गरेको र सोही अनुरुप सवैले सकारात्मक धारणा बनाउनुपर्नेमा जोड दिए । उनले पछिल्लो समय देशमा भइरहेका उत्तेजक गतिविधिमा नेतृत्व तहमै रहेका दलका नेताहरु सामेल भएको आरोप पनि लगाए ।

सम्बन्धित

भारतको महाराष्ट्रमा भएको रेल दुर्घटनामा चार जना नेपालीको मृत्यु

तीन प्रदेशमा आंशिक बदली, हिमाली भागमा हल्का हिमपातको सम्भावना

बहिरा सम्बन्धी साङ्केतिक भाषाको गोष्ठी विराटनगरमा सुरु, मन्त्री राइले गरे उद्घाटन

हिसान खेलसप्ताह : पुरुष फुटबलमा मोडर्न एरा, सगरमाथा र होलीचाइल्ड विजयी