featured photo: Birat Post

बैशाख,२६ मंगलबार । नासाले मे ९ र १० अर्थात आज र भोली दुई ठूला क्षुद्रग्रह पृथ्वीको नजिक आउने चेतावनी दिएका छन् ।पृथ्वीमा हरेक दिन कुनै न कुनै क्षुद्रग्रह पृथ्वीबाट गुज्रिरहेको हुनाले अन्तरिक्ष वैज्ञानिकहरू बारम्बार क्षुद्रग्रहहरू पृथ्वीको नजिक आउने घटनालाई सामान्य नै मान्छन् ।

ग्रहहरूको निर्माणको क्रममा बाँकी रहेका टुक्रालाई क्षुद्रग्रह भनिन्छ। तिनीहरू आफ्नो कक्षामा सूर्यको वरिपरि घुम्छन्। कहिलेकाहीँ यी क्षुद्रग्रहहरू धेरै ठूला आकारका पनि हुन सक्छन् । जुन पृथ्वीमा खस्यो भने विनाश ल्याउन सक्छ। नासाका अनुसार आज पृथ्वीको नजिक आउने २०२३ एचजी–१ नामको क्षुद्रग्रह हो । यो एउटा ठूलो घरको आकारको उल्कापिण्ड हो। मापनको कुरा गर्दा यो ६० फिटको ढुंगा हो । पृथ्वीको सबैभन्दा नजिक आएपछि यसको दुरी ४१ लाख ६० हजार किलोमिटर हुनेछ। यसको गति ७ हजार २०० किलोमिटर प्रतिघण्टा रहेको बताइएको छ ।

यसपछि मे १० अर्थात भोलि बुधबार पनि एउटा ठूलो क्षुद्रग्रह पृथ्वीको नजिक आउँदै छ । यसको नाम २०२३ जेडी हो जुन २५० फिट अग्लो छ। यो पनि ठूलो घरको आकारको छ। जब यो पृथ्वीको सबैभन्दा नजिकको बिन्दुमा आउँछ, हाम्रो ग्रहबाट यसको दूरी १३ लाख २० हजार किलोमिटर मात्र हुनेछ। यति ठूलो आकारको क्षुद्रग्रह पृथ्वीसँग ठोक्किएमा ठूलो विनाश निम्त्याउन सक्छ ।

अन्तरिक्ष एजेन्सी नासाले लगातार क्षुद्रग्रहहरू ट्र्याक गर्दछ। आजभोलि क्षुद्रग्रह पृथ्वीतर्फ आउने धेरै घटनाहरु सार्वजनिक भइरहेका छन् । नासाले पृथ्वीमा क्षुद्रग्रह ठोक्किने सम्भावना निकै कम रहेको तर १५० फिट वा त्योभन्दा ठूलो क्षुद्रग्रह पृथ्वीसँग ठोक्किएमा पृथ्वीलाई ध्वस्त पार्न सक्ने बताएको छ । सन् २०१३ मा रुसी आकाशमा चेल्याबिन्स्क नामको उल्कापिण्ड विस्फोट हुँदा ७ हजार भवनमा क्षति पुगेको थियो । जसमा १४ सयभन्दा बढी मानिसहरु घाइते भएका थिए। यो क्षुद्रग्रहको आकार ५९ फिट मात्र थियो ।